Goals

AlbaNur campaigns to improve access for Albanian journalists to the sources of information in Albanian Lands. It speaks out against the lack of co-operation and the abusive treatment that still occurs when it comes to Albanian journalists.

Per te shikuar filmin nga Halil Budakova ju lutem Klikoni Ketu!

Portreti i Halil Budakova ne gazeten Kosova Sot

Portreti i Halil Budakoves ne gazeten Kosova Sot

Një detyrë, më ndryshe se të tjerët

Halil Budakova është regjisori i parë i cili në filmat e tij me një guxim të rrallë trajton plagën më të rendë të shoqërisë kosovare - krimin e organizuar, dhe në mënyrë direkte ngre zërin kundër çerdhes së bandave kriminale, e cila ndodhet në organet e larta të pushtetit

Ndër regjisorët më produktiv i gjeneratës së re është Halil Budakova. Emri i këtij regjisori me shumë respekt përmendet nga rinia dhe masa e gjerë e shtresës popullore. Halili menjëherë në vitet e para të pasluftës e përfitoi publikun me filmat e tij të zhanrit policor. Në vitet e pasluftës, për një pjesë të regjisorëve tanë Kosova u shndërrua në vend ku mund të fitohej paraja pa djersë. Disa prej këtyre regjisorëve harruan vitet e tmerrshme të luftës, pasojat e luftës ku shumë nëna kishin mbetur me duar në gjinj, ku lufta kishte lindur komandantë e luftëtarë që shquheshin për guxim e trimëri, një pjesë e regjisorëve tanë i shikonin si materie e lëndës së parë prej të cilëve mund të arrihej deri të paraja. Tipa të tillë u lëshuan pas gjahut të tyre duke shkuar herë te familjaret e herë të shokët e komandantëve të ndryshëm për t’i influencuar dhe bindur se duhet bërë filma dokumentarë e madje artistik për luftën dhe komandantët. Këta nën sqetulla mbanin vetëm sinopsiset pa skenarë, por nuk harronin të thoshin se kishin shkruar shumë materiale. Prej asaj kohe e deri sot u punuan shumë filma dokumentarë, por deri më tani prej të gjithë atyre filmave të realizuar vetëm katër ose pesë prej tyre mund të llogaritën se janë bërë mirë, të tjerët jo vetëm që nuk shikohen, por edhe aq keq të punuar sa që mëkat është për paratë që u derdhen për të punuar filma të tillë.

Çuditërisht, në çdo vend ku u zhvilluan luftëra çlirimtare gazetarët, kameramanët dhe regjisorët janë ata që luftës i japin jehonë në opinionin e huaj. Ç’u bë me jehonën e problemeve që ballafaqohej popullsia e jonë qe nga vitet e ’90-ta?! Ç’u bë me jehonën e viteve të luftës sonë?! Ç’bënin kjo shtresë nga e cila varej çdo fjalë e shkruar në shtyp dhe çdo filmim në shirit?! Asgjë ose shumë pak gjë, sepse pjesa më e mirë e gazetarëve dhe regjisorëve tanë do të futeshin në parti politike. I fshehën kamerat, i humbën lapsat e fletoret, dh iu përveshën politikës.

Në rast padrejtësie që i bëhet popullsisë gazetari dhe regjisori janë ndër të parët që rrezikojnë punën e në rast lufte këta rrezikojnë jetën e tyre. E në Kosovë erdhën gazetarë të huaj që vdiqën nga plumbat e ushtrisë serbe. Erdhën kameramanë dhe regjisorë të huaj që rrezikuan jetën për t’i dhënë jehonë luftës sonë e tanët i fshehën kamerat e tyre për t’i ruajtur që t’i përdornin pas luftës. Dhe i përdorën, fituan për vete, por nuk bënë asgjë për ta informuar opinionin e huaj për atë që kishte ndodhur te ne. Bënë filma për të fituar para dhe për t’i joshë familjarët.

Filma që thyejnë rekorde të shikueshmërisë në Kosovë

Halil Budakova, si regjisor, vetës ia vuri një detyrë më ndryshe se të tjerët. Problemet sociale që përjetonte populli ynë në vitet e pasluftës e preknin këtë regjisor të ri. Këtë djalosh thellë në shpirt do ta prekë padrejtësia që u bëhej familjeve të dëshmorëve dhe viktimave të luftës nga personalitetet mafioze-politike. Halili do t’i përvishet punës dhe para publikut do të dalë me filmat e tij, ku denoncohen padrejtësitë e njëpasnjëshme që po i bëheshin popullsisë së varfër e të vuajtur. Halil Budakova është regjisori i parë i cili në filmat e tij e denoncon dhe e lufton korrupsionin e disa personaliteteve politike. Në objektivin e tij e ka vërë në spikamë luftën kundër krimit të organizuar, i cili origjinën e ka diku lartë në pushtet dhe shtrihet deri te shtresat më të ulëta. Në secilin prej filmave të Halil Budakovës trajtohet lufta kundër vetive më negative, por në asnjërin prej tyre nuk mund të hasim se policia e jonë është e involvuar në këtë luftë të rrezikshme. Halil Budakova në filmat e tij e tregon një respekt e një simpati të veçantë për Shërbimin Policor të Kosovës, që e trajton si një forcë të pakorruptuar dhe përmes se cilës luftohet krimi i organizuar. Djelmoshat e SHPK-së, në filmat e Halil Budakovës janë simpatikë, të stërvitur dhe të përkushtuar që deri ne fund ta luftojnë çdo veti negative, si drogën, prostitucionin dhe korrupsionin, nga se këto tri segmente janë destruktive, jo vetëm për një familje, por për të shoqërinë tonë.

Halil Budakova, në filmin “Djelmoshat e rrezikshëm”, e trajton temën problemeve që përballët rinia e pasluftës kosovare dhe ky film gjen simpati të madhe sidomos të të rinjtë tanë, të cilët mbushnin sallat e kinemave në tërë Kosovën ku shfaqej filmi. Me këtë film, Halil Budakova po i thyente rekordet e shikueshmërisë në tërë Kosovën, e madje të rinjtë tanë preferonin më shumë filmin e Halil Budakovës, se sa filmat me yje të Holivudit. Rinisë sonë i interesonte për të shikuar problemet me të cilat ballafaqoheshin të rinjtë çdo ditë dhe i adhuronin aktorët vendorë që ishin bërë model për rininë tonë. Me këtë film Halil Budakova ia siguroi vetës emrin e regjisorit që po i thyente rekordet e shikueshmërisë dhe këtë deri me tash ende nuk ka arritur t’ia rrezikojë asnjë regjisor tjetër.

Guximi i rrallë krijues për tema aktuale

Me filmin “Krim pa krisma”, që është një dramë familjare sociale, Halil Budakova do vente në pah problemet e dashurisë se një çifti të pasur. Në këtë film, burri me lidhjet e tij me njerëzit e pushtetit arrin të pasurohet brenda pak kohe, ku shohim thyerjen e këtij çifti dikur shumë të dashuruar.

Në filmin “Nëntoka”, Halil Budakova trajton një operacion të suksesshëm të njësitit policor të SHPK-së kundër krimit të organizuar, që në Kosovën e pasluftës ka arritur kulmin. Shefi i njësitit, një polic ambicioz dhe i pakorruptuar, dëshiron asgjësimin e bandave kriminele, të cilët e terrorizojnë popullsinë e pafajshme e madje edhe rininë. Por, posa ndërmerr aksione serioze dhe konfiskon sasinë e drogës me vlerë prej pesë milionë eurosh, kreu i bandës i kundërvihet familjes së tij, duke ia vra gruan dhe fëmijët, që për fat njëri prej tyre plagosët rendë dhe mjeket arrijnë t’ia shpëtojnë jetën. Pas përjetimit të tragjedisë familjare, shefi i njësitit dëshiron ta zbaton drejtësinë, por sharra i has në gozhdë, sepse bandat mafioze kanë lidhje direkte me ministrin, i cili po ashtu është pjesë e këtyre bandave.

Halil Budakova është regjisori i parë i cili me një guxim të rrallë trajton plagën më të rendë të shoqërisë kosovare - krimin e organizuar dhe në mënyrë direkte ngre zërin kundër çerdhes së bandave kriminale, që ndodhet në organet e larta të pushtetit. Halil Budakova nuk e akuzon vetëm krimin e organizuar dhe bandat kriminele, por tërë Qeverinë e Kosovës, që nuk kujdeset për luftëtarët e lirisë, për familjet e dëshmorëve dhe për skamjen që e ka kapluar skajshmërisht tërë Kosovën.

Për punën e regjisorit Halil Budakova një pjesë e madhe profesionistesh flasin me respekt, ndërsa një pjesë tjetër me skepticizëm, ndonjë tjetër me injorim, por publiku i Kosovës flet me admirim.

E shtunë, KOSOVA SOT, 15.12.2007
 

Ju mund te shkruani per Halil Budakoven ne Free Blog. KLIKO!