[Alfredi]

GJND vendosi në favor të shtetit të Kosovës

Gjykata Ndërkombëtare e Drejtësisë (GJND) në Hagë ka vërtetuar sot me shumicë votash se shpallja e deklaratës së pavarësisë së Republikës së Kosovës nuk e ka shkelur të drejtën ndërkombëtare.

Vendimi është kumtuar nga kryetari i GJND-së, gjykatësi japonez Hisashi Ovada. Në favor të ligjshmërisë së shpalljes së pavarësisë së Kosovës janë deklaruar 10 gjykatës, ndërsa kundër 4 gjykatës, nga gjithsejt 15 gjykatësit e GNJD-së.

Duke lexuar opinionin, presidenti i GJND-së, Hisashi Ovada, tha se e drejta ndërkombëtare “nuk ndalon deklaratat e pavarësisë”.

Ovada tha se shpallja e njëanshme e pavarësisë së Kosovës nuk ka shkelur asnjë dokument të Kombeve të Bashkuara.

Në këtë aspekt, ai ka përmendur ecurinë e tërësishme të zhvillimeve politike në Kosovë, që kanë të bëjnë me vendosjen e misionit të OKB-së në Kosovë, vendosjen e KFOR-it e të tjera. Sipas tij, shpallja e pavarësisë është proces politik dhe jo ligjor.

Rreth 40 shtete kishin të pranishëm në Pallatin e Drejtësisë në Hagë, por edhe me praninë e ministrave të jashtëm të Kosovës, Skender Hyseni dhe anën tjetër, Vuk Jeremiç.

Në mesin e 15 gjyqtarëve prej të cilëve përbëhet trupi gjykues, nëntë janë nga vende që e kanë njohur pavarësinë e Kosovës e ata janë gjykatësit nga: Japoni, Sjerra Leone, Jordania, SHBA-ja , Gjermania, Franca, Zelanda e Re, Britania e Madhe dhe Somalia, ndërkaq vetëm gjashtë gjykatës të trupit gjykues vijnë nga vende që nuk e kanë njohur pavarësinë e Kosovës e ata janë gjykatësit nga Sllovakia, Kina, Meksika, Maroku, Rusia dhe Brazili. Republika e Kosovës shpalli pavarësinë më 17 shkurt të vitit 2008, ndërsa deri tani 69 shtete kanë njohur ate.

,

[Alfredi]

Presidenti shqiptar, Bamir Topi dhe kryeministri Sali Berisha kanë përshëndetur vendimin e GJND-së për pavarësinë e Kosovës.

Presidenti i Republikës së Shqipërisë, Bamir Topi ka përshëndetur homologun kosovar, Fatmir Sejdiu, për vendimin e GJND-së në favor të pavarësisë së Kosovës.

“Opinioni është një hap i rëndësishëm për të ardhmen e Kosovës”, ka deklaruar Topi në një bisedë telefonike me Sejdiun.

Edhe kryeministri Sali Berisha ka përshëndetur në një konferencë për shtyp vendimin e GJND-së për pavarësinë e Kosovës. Berisha ka deklaruar se gjykata e Hagës faktoi para gjithë planetit se pavarësia e Kosovës ishte më se e drejtë.

“Përshëndesim vendimin e GJND-së. Gjykata e Hagës, trupi gjykues më i lartë i botës, u faktoi qytetarëve të planetit se pavarësia e Kosovës është në frymë të plotë me të drejtën ndërkombëtare. Është në frymë të plotë me të gjitha rregullat, rezolutat e rregulloret. Ky është një vendim historik, një kontribut madhor për paqen dhe stabilitetin në Ballkan e më gjerë”, është shprehur Berisha.

Ai shtoi se vendimi i gjyqtarëve vërtetoi të drejtën e popullit kosovar për pavarësi e vetëvendosje dhe mbylli kapitullin e dhimbjeve dhe vuajtjeve që ka kaluar kombi shqiptar.

“Me analizën dhe mendimin e tyre, gjykatësit më të lartë të botës faktuan në mënyrë të pakundërshtueshme se shpallja e pavarësisë ishte rezultat i pashmangshëm, ishte një e drejtë e patjetërsueshme e përfaqësuesve të popullit të Kosovës. Ky vendim është gjykimi dhe hedhja poshtë e të gjitha traktateve që ranë mbi kombin shqiptar dhe i shkaktuan atij dhimbje, vuajtje dhe sakrificat më të mëdha dhe më të rënda”, ka theksuar Berisha.
Presidenti Topi dhe kryeministri Berisha: Vendimi i GJND-së historik

Kryeministri shqiptar ka shtuar më tej se tani për Kosovën, por edhe për Serbinë hapen perspektiva të reja, të cilat udhëhiqen nga ideali për anëtarësimin në BE.

Berisha ka shprehur gjithashtu gatishmërinë e vendit të tij për të kontribuar në përmirësimin e marrëdhënieve mes Prishtinës dhe Beogradit.

“Dy vende, pavarësisht nga historia e shkuar, tani kanë të përbashkët idealin evropian. Shqipëria është e vendosur të japë gjithë kontributin e saj për një kapitull të ri në marrëdhëniet mes serbëve dhe shqiptarëve, mes Tiranës dhe Beogradit dhe mes Prishtinës dhe Beogradit”, ka theksuar Berisha, duke shtuar se vendimi i GJND-së u dha fund planeve për ndarje e shkëmbime territoresh.

.

[Kujdestari]

BDSH, uron qeverinë dhe miqtë e shqiptarëve

Nëpërmjet një komunikate për shtyp Bashkimi Demokratik Shqiptar (BDSH), uron qeverinë e Kosovës dhe miqtë e shqiptarëve. “Vendimi i Gjykatës Ndërkombëtare të Drejtësisë se pavarësia e Kosovës nuk është në kundërshtim me normat ndërkombëtare të Kombeve të Bashkuara gëzon tej mase çdo shqiptar jo vetëm në Kosovë, por edhe jashtë saj. Ky vendim paraqet edhe një fitore bindëse të qeverisë së Kosovës dhe miqve të shqiptarëve, në vrazhdën e sukseseve të një pas njëshme drejt njohjes dhe pranimit të Kosovës nga shtetet anëtare të Kombeve të Bashkuara”, thuhet në komunikatën e BDSH-së.

Më tej në komunikatë thuhet “Në emrin tim personal dhe në emër të anëtarëve dhe simpatizantëve të Bashkimit Demokratik Shqiptar, urojmë qeverinë e Kosovës për vendimin e GJND-së, duke u dëshiruar suksese në zhvillimet e mëtejshme drejt anëtarësimit në Kombet e Bashkuara dhe institucionet Euro-atlantike.

Bashkimi Demokratik Shqiptar uron dhe falënderon të gjithë shtetet mike të shqiptarëve, në veçanti Shtetet e Bashkuara të Amerikës për kontributin e tyre jo vetëm në pavarësimin e Kosovës por edhe në luftën për njohjen e saj ndërkombëtare”, përfundon komunikata e nënshkruar nga Bardhyl Mahmuti, kryetar i BDSH-së.

[Kujdestari]

Sarkozy: Franca dhe partnerët do të ndërmarrin hapa për Kosovën

Presidenti i Republikës së Francës, Nicolas Sarkozy i ka shkruar një letër Presidentit të Republikës së Kosovës, Fatmir Sejdiu, nëpërmjet së cilës e ka uruar për vendimin e Gjykatës Ndërkombëtare të Drejtësisë, si dhe ka ripërsëritur zotimin e Francës për ta mbështetur edhe më tej vendin tonë.
Në tekstin e letrës së Presidentit të Francës, Nicolas Sarkozy dërguar homologut të tij nga Kosova, Fatmir Sejdiu, ndër të tjera thuhet: "Gjykata Ndërkombëtare e Drejtësisë e ka hequr tërë paqartësinë sa i përket ligjshmërisë së deklaratës së pavarësisë së Kosovës dhe i ka arsyetuar shtetet, si Francën, edhe Kosovën, të cilat mendonin se kjo deklaratë është në përputhje me të drejtën ndërkombëtare. I gëzohem këtij vendimi që i kontribuon stabilitetit të rajonit dhe i bën më të fuqishme përpjekjet tuaja, që prej më shumë se dy vjetësh, për konsolidimin e shtetit tuaj të ri", thuhet në letrën e Presidentit francez.

Më tej Sarkozy shkruan "Mendimi i Gjykatës, për këtë jam i bindur, do të duhej t’i bindë shtetet që ngurrojnë ta njohin Kosovën. Franca, me partnerët e saj, në ditët në vijim, do të ndërmarrë hapa të rinj në këtë aspekt duke u mbështetur në argumentet e Gjykatës Ndërkombëtare të Drejtësisë.
Ky mendim do ta bëjë, po ashtu, edhe më të fuqishëm vullnetin e 22 shteteve anëtare të Bashkimit Evropian që e kanë njohur Kosovën, që BE-ja t’i ofrojë asaj procesin e njëjtë për bashkim, i cili tanimë u është ofruar fqinjëve të saj. Për këtë, ju mund të llogarisni në Francën për të vepruar në mënyrë tërësisht aktive, ashtu siç ajo është e angazhuar për t’i afruar pikëpamjet e ndryshme të shteteve anëtare.
Është e rëndësishme që Kosova të mos qëndrojë këtu dhe të punojë edhe më shumë, e fortë nga shtimi i legjitimitetit që i jep mendimi i Gjykatës, për të përmirësuar situatën e komunitetit serb që jeton në territor.

Përfaqësuesja e Lartë e Bashkimit Evropian, Zonja Ashton, ju propozon, në emër të 27 shteteve anëtare unanime, që të merrni pjesë në dialog duke e pasur pikërisht këtë qëllim. Kosova duhet ta shfrytëzoj këtë rast dhe të angazhohet me mirëbesim në këtë çështje që do të kontribuojë për tejkalimin e shumë vështirësive konkrete, të cilat i vënë në kundërshti ende shtetin tuaj dhe Serbinë.

Duke shpresuar që së shpejt do të kem rastin personalisht t’i evokoj me ju këto çështje, Ju lus të pranoni, Zotëri President, besimin e konsideratës së lartë", thuhet në fund të letrës së Presidentit të Francës, Nicolas Sarkozy.