Intervista e Hashim Thacit per Gazeten Java

Intervista e Hashim Thacit per Gazeten Java

SHPALLJA E KOORDINUAR E PAVARSISË ËSHTË MREKULLI

Në Kosovë po fillon periudha e ndërtimit të institucioneve nga vet kosovarët

Hashim Thaci: Ne nesër do të kemi përsëri takim, një takim që mendoj do të rezultojë me vendim meritor. Ndërsa, për emra ende ka kohë, sepse duhet të kemi njerëz me fuqi politike, por edhe me përgatitje të lartë profesionale, në mënyrë që zotimet, të cilat i kam prezentuar para qytetarëve, të filloj menjëherë t’i implementoj.

GAZETA JAVA: A do të krijohet koalicioni brenda këtij viti?

Hashim Thaci: Definitivisht, unë besoj që po…

Fitorja e Partisë Demokratike të Kosovës nuk do të reflektojë si humbje për askend

GAZETA JAVA: Pse me LDK-në?

Hashim Thaci: Unë kam biseduar me të gjithë, pa përjashtime. Unë të gjithë i shoh si partner, si në Qeveri, si në spektrin pozitë-opozitë, dhe ky diskutim imi ka qenë shumë i frytshëm edhe në uljen e tensioneve në skenën politike kosovare. Nuk paragjykoj ndaj asnjë subjekti politik. Por, Kosovës i nevojitet një Qeveri që mund të sjellë rezultate. Dhe, unë dua që të punoj me njerëz që i marrin përgjegjësit, që i implementojnë ato përgjegjësi dhe që, natyrisht, edhe marrin edhe japin llogari.

GAZETA JAVA: Ju z. Thaçi keni qenë kritikuesi ma i fortë i LDK-së. LDK ka dëshmuar që ka keq-qeverisur në Kosovë. Pse ju tash duhet me i besu LDK-së, që ata tani do të jenë të përgjegjshëm?

Hashim Thaci: Sa i përket kësaj pyetje, ka fol Sovrani me 17 Nëntor dhe Sovrani m’ka dhënë të drejtë në popull. Kjo punë nuk është punë Kanuni, është punë parimesh, të cilat janë reflektuese për spektrin tjetër politik. Të gjithë ata që marrin përgjegjësi për t’iu bashkuar vizionit tim dhe Partisë Demokratike të Kosovës – natyrisht që do të jem edhe mirëkuptues dhe njeri që do të punoj me të gjithë. Kemi shumë punë për të bërë dhe unë jam i bindur se do të kemi fillim të sukseshëm të Qeverisë së ardhshme. Sepse, për herë të parë në Kosovë, do të udhëheqin njerëzit me legjitimitet qytetar dhe jo me kalkulime, improvizime apo matematika që e kanë dëmtuar funksionalizimin e institucioneve shtetërore të Kosovës. Dhe, nuk është rastësi që sot jemi në vendin e katërt si vend me korrupcion në botë.

GAZETA JAVA: A keni me mujt me ndrrue një ministër që dëshmohet i korruptuem?

Hashim Thaci: Kryeministri emron dhe shkarkon Ministrin.

GAZETA JAVA:: Ju po thueni që keni me qenë ma ndryshe se Agim Çeku në këto kompetenca?

Hashim Thaci: Natyrisht se po. Unë jam personaliteti më i votuar në Kosovë dhe autoriteti i fuqisë qytetare dhe politike më jep edhe fuqi, më jep edhe hapësirë, edhe përgjegjësi që partnerët të jenë edhe më të përgjegjshëm në angazhimet e përbashkëta për qeverisje të mirë në Kosovë.

GAZETA JAVA: Mendoni edhe nëse ai është Ministër i LDK-së?

Hashim Thaci: Unë nuk dua të prejudikoj - i asaj apo i kësaj partie – por, qeverisja e deritashme ka qenë e dështuar. Tash është koha e fillimit të ri, e ndryshimeve, e viti të ri, me ndryshime të reja, me lidership të ri, me vizion të ri, dhe këtë do ta realizoj.


Identiteti i Qeverisë sime do të jetë identitet i Qeverisë së Kosovës dhe jo i Partisë Demokratike


GAZETA JAVA: Në deklarimet parazgjedhore keni thanë se nuk do të bani asnjë kompromis me programin e juej - a keni ba kompromis me programin e LDK-së?

Hashim Thaci: Asnjë kompromis në asnjë mënyrë nuk është bërë, jo vetëm me vizionin tim, po as me të tjerët, të cilët e kanë mirëpritur këtë vizion…qytetarët e kanë votuar me shumicë. Sepse vizioni jonë për edukimin, transportin, për ndërtimin e autorrugëve, për energjinë, për shoqatat e luftës, për mirëqenien sociale të qytetarëve, për reforma në shëndetësi, për pensionistët, për bujqësi – mendoj se kanë qenë reflektuese dhe mirëkuptuese nga shumica e qytetarëve të Kosovës. Unë do të filloj me reforma, do të filloj me përgjegjësi të reja, me punë konkrete. Kosova është vend i mundësive, këto mundësi do t’i shfrytëzojë maksimalisht. Kam energjinë, kam gatishmërinë, e kam përkrahjen ndërkombëtare dhe qytetare dhe bashkë do ecim përpara.

GAZETA JAVA: A doni të thoni z. Thaçi se LDK-ja do të jetë në Qeveri, por do të implementojë programin e PDK-së?

Hashim Thaci: Unë dua që, kushdo që të jetë në Qeverinë time, t’i ruhet dinjiteti. Identiteti i Qeverisë sime do të jetë identitet i Qeverisë së Kosovës dhe jo i Partisë Demokratike apo i ndonjë force tjetër. Do të jetë programi i Qeverisë së Kosovës që mishërohet me vullnetin e shumicës së qytetarëve të vendit.

GAZETA JAVA: Kam qenë prezent në “Sheshin 21” pas zgjedhjeve të balotazhit ku simpatizantët tuaj kanë brohoritur jo me LDK-në. A mendoni që e keni tradhtuar elektoratin tuaj?

Hashim Thaci: Unë zgjedhjet i kam fituar me vizionin për të ecur bashkë përpara dhe jo për të përçarë vendin. Unë do të punoj ta mbaj vendin dhe qytetarët të bashkuar. I kuptoj reagimet e njerëzve, ka pasur edhe pretendime kushtëzuese, por të gjitha këto janë momente të tejkaluara dhe unë do të marrë vendime të arsyeshme, vendime në interes të vendit, vendime që e çojnë përpara shtetin e Kosovës, vendime që i hapin perspektivë mirëqenies së familjeve dhe gjithë qytetarëve të Kosovës.

GAZETA JAVA: Z. Thaçi, keni qenë Partia e dytë – keni qenë në opozitë dhe vendi nuk është përçarë, pse mendoni se mund të përçahet vendi nëse LDK-ja mbetet në opozitë?

Hashim Thaci: Unë nuk isha duke folur për partinë që ju po e përmendni, unë po flas si fenomen në skenën politike dhe mua qytetarët më kanë besuar që të investoj në kohezionin politik dhe qytetar. Do të punoj në këtë drejtim. Jo të gjitha opozitat janë gjithëherë korrekte apo konstruktive dhe të përgjegjshme sikurse që kemi qenë ne në dy vitet e fundit. Unë i kam kërkuar edhe falje elektoratit për shkak të një moratoriumi opozitar në dy vitet e fundit. Por, gjithë kjo është bërë për hir të statusit politik, për hir të pavarësisë - gjë që është keqpërdorur prej autoriteteve të Qeverisë aktuale. Prandaj, fitorja e Partisë Demokratike të Kosovës nuk do të reflektojë si humbje për askend – unë jam në shërbim të të gjithëve.

GAZETA JAVA: Në intervistën e zhvilluar me z. Daut Haradinaj, ai na ka thënë se është vështirë të Qeveriset pa LDK-në?

Hashim Thaci: No Comment…


Për herë të parë Kosova e bënë Qeverinë pa ndikime, pa presione, pa ndërmjetësime


GAZETA JAVA: Çka ndodhi me AKR-në? A mund të thuhet se mund të përfshihet në koalicion?

Hashim Thaci: Unë kam raporte bashkëpunimi me çdo subjekt politik. Natyrisht dhe me formacionin e AKR-së. Unë i uroj sukses këtij formacioni në këto zgjedhje, që ka bërë një kthesë interesante. Natyrisht se spektri politik kosovar do të profilizohet edhe më tepër dhe do të jem bashkëpunues me gjithë spektrin politik, qoftë në pushtet apo opozitë. Por, e vlerësoj përkushtimin interesant që e ka treguar para dhe gjatë fushatës ky formacion politik.

GAZETA JAVA: Është përfolur shumë se ka pasur presione ndërkombëtare për bërjen e koalicionit. A është e vërtetë?

Hashim Thaci: Në asnjë mënyrë, në asnjë rrethanë, nga askush. Përkundrazi, për herë të parë Kosova e bënë Qeverinë pa ndikime, pa presione, pa ndërmjetësime. Ne duhet të komunikojmë drejtëpërdrejt me njëri tjetrin, duhet ta mirëkuptojmë njëri -tjetrin, jetojmë të gjithë në Kosovë. Natyrisht, Kosova do ta ketë Qeverinë shumë të fortë, por do ta ketë edhe opozitën korrekte, konstruktive, besoj.

Shpallja e koordinuar e pavarsisë është mrekulli

GAZETA JAVA: Po i afrohemi finales së madhe – procesit final të Pavarësisë së Kosovës. Kur mendoni se ky proces mundet me përjetue një finale dhe si e shihni këtë finale?

Hashim Thaci: Edhe në mbledhjen e Këshillit të Sigurimit, kur ishim së bashku me z. Sejdiun, janë qartësuar pozicionet shumë. Shtetet e Bashkuara të Amerikës janë shumë të vendosura dhe të prera që ky proces të përmbyllet sa ma shpejt që të jetë e mundur. Pastaj, koordinimi me Shtetet e Bashkimit Europian, gjithashtu është në rrugë shumë të mirë dhe do të kemi vendim unanim të Washingtonit dhe Brukselit për të ardhmen e Kosovës. Është folur shpesh për data, unë e ritheksoj se Kosova, Washingtoni dhe Brukseli e dinë datën e saktë të Pavarësisë dhe kjo do të ndodhë shumë shpejt. Me rëndësi për ne është që të kemi një fillim të sukseshëm të implementimit të procesit të Pavarësisë së Kosovës. Rusia mund ta pengojë, mund ta zvarrisë këtë proces, mirëpo nga mbledhja e fundit e Këshillit të Sigurimit, çështja e pavarësisë së Kosovës ka dalur nga ajo kornizë dhe sot është në autoritetin e qendrave vendosëse më të rëndësishme globale – Washingtonit dhe Bashkimit Europian. Natyrisht, do të kemi njohje edhe prej vendeve të rajonit. Dikush do të pyes: a do ta shpallni pavarësinë? – pavarësinë do ta shpallin Institucionet e Kosovës, por gjithçka do të shkojë në koordinim të ngushtë me Shtetet e Bashkuara të Amerikës dhe BE.

GAZETA JAVA: A mundeni me na ba dallimin e qartë midis shpalljes unilaterale dhe shpalljes së koordinuar të pavarsisë së Kosovës. Ku është dallimi?

Hashim Thaci: Nuk është problem me shpallë pavarësinë. Por, nuk do t’ua dërgojmë sinjalin e izolimit për vendin dhe qytetarët. Objektivi dhe vizioni jonë është integrimi i Kosovës në strukturat e Bashkimit Europian dhe ato të NATO-së. Prandaj, shpallja e koordinuar e pavarësisë është mrekulli, garanton sukses. Shpallja kokë n’vete mund të sjellë telashe të mëdha. Pra, do të kemi shpallje të koordinuar dhe njohje kualitative të pavarësisë së Kosovës.


Kosova ka identitetin e vet shtetëror

GAZETA JAVA: Ju në gazetën “Java” keni thënë se nuk e jepni Flamurin për Shtetin – jeni Qeveria e cila duhet me marrë vendim për ikonografinë e shtetit të nesërm. Mbi cilat baza mendoni se duhet me u ndërtue kjo ikonografi?

Hashim Thaçi: Kosova ka përgatitur Kushtetutën e saj, do të ketë simbolet identifikuese kosovare, të respektuara prej qytetarëve të vendit. Simbolet kombëtare do t’i ruajmë dhe kultivojmë si sytë e ballit. Por, në të njëjtën kohë, Kosova po e dëshmon identitetin e vet shtetëror, demokracinë qytetare.

Do ta qes Kosovën n’dritë!

GAZETA JAVA: A do të vazhdoni të jeni këmbëngulës se nuk do të përkrahni projektin për “Termocentralin C” - i paraparë nga Qeveria - të startojë me 2000/2100 megavat prodhim të energjisë?

Hashim Thaci: Ne dallojmë nga Qeveria aktuale edhe për sektorin e energjisë. Unë kam besim të plotë që me fillimin e punës së Qeverisë do t’i përkushtohem me energjitë më të larta tek lidershipi dhe përfshirjes së ekspertëve, në mënyrë që të fillojë realisht që Kosova të ketë rrymë dhe pastaj edhe me projektet e tjera që do të vijnë me ndërtimin e termocentraleve të reja energjetike. Mirëpo, duhet treguar se në sektorin e energjisë kanë ndodhur gjëra të këqija, të cilat e kam obligim t’i përmirësoj. Kanë ndodhur gjëra në keqmenaxhim që i kanë kushtuar vendit dhe qytetarëve. Sot Kosova është në terr, e kam obligim me e vendosë në dritë dhe do ta vendosi.
 

Nga Petrit Musolli
Jan 8, 2008, 12:51